
Павлодарда көлік жүргізушісі мемлекеттік нөмірінің орнына «Жұмабектің бажасы» деген жазумен жүрген. Ол мұны 1 сәуірге орай жасағанын айтады. Алайда павлодарлық бұл әзіл екенін айтқанына қарамастан полицейлер оған айыппұл салды.
Полиция мәліметінше, жүргізуші қаладағы орталық көшелердің бірінде ұсталған.
«Павлодар тұрғыны мемлекеттік тіркеу нөмірі жоқ ВАЗ 2170 көлігін айдап келе жатқан. Одан бөлек, жүргізуші әзілқой болып шықты — ол қолмен көлігінің артына «Жұмабектің бажасы» деп жазып қойған», — дейді Полиция басқармасының басшысы Данияр Бек.
Жүргізушіге қатысты Әкімшілік құқық бұзушылық туралы кодекстің 590-бабы, 2-бөлігі бойынша әкімшілік хаттама толтырылып, 10 АЕК көлемінде айыппұл салынды. Көлік айып тұрағына жеткізілді.