Жолды тазаламаған «ҚазАвтоЖол» басшылары жауапқа тартылды

Қостанай облысында жолдарды уақытылы тазаламаған «ҚазАвтоЖол» ЖШС өңірлік филиалының лауазымды тұлғалары жауапкершілікке тартылды. ҚазАқпарат бұл туралы облыстық Полиция департаментінің баспасөз қызметіне сілтеме жасап хабарлайды.

Жолдағы қауіпсіздікті және көлік құралдарының кедергісіз қозғалысын қамтамасыз ету мақсатында Полиция департаменті жергілікті атқарушы органдармен және «ҚазАвтоЖол» ЖШС өкілдерімен бірлесіп күн сайын автожолдарда тексеру жүргізеді. «Автожолдарды тексеру барысында кемшіліктер анықталды. Әсіресе, жол жиектерінде қар үйінділері көптеп жиналған. Мемлекеттік стандартқа сәйкес жолдарды уақытылы тазаламағаны және автомобиль жолдарын қысқы мерзімде күтіп ұстау жөніндегі талаптарды, жол қозғалысы қауіпсіздігін қамтамасыз етудің белгіленген ережелерін орындамағаны үшін «ҚазАвтоЖол» ЖШС-ның жауапты тұлғаларына әкімшілік хаттама толтырылды. Олар ҚР ӘҚБтК-нің 631-бабының 1-бөлігі бойынша жауапкершілікке тартылды», — деді облыстық Полиция департаментінің баспасөз хатшысы Ирина Беженарь.