Жол апатынан зардап шеккен әйел аяғынан айырылды

Нұр-Сұлтан әкімі Бақыт Сұлтанов пен денсаулық сақтау министрі Елжан Біртанов жол апатынан зардап шеккендерге барып қайтты, — деп хабарлайды Tengrinews.kz тілшісі әкімдіктің сайтына сілтеме жасап.

Әкім мен министр қалалық № 2 көпсалалы ауруханаға барды. Клиниканың бас дәрігері Иван Лидің айтуынша, қазіргі уақытта стационарда зардап шеккен 13 адам жатыр. Олардың сегізінің жағдайы — орташа ауыр. Барлығы травматология бөлімінде жатыр, екі адам кеуде бөлігінің хирургиясы бөлімінде жатыр. Тағы үшеуі жансақтау бөлімінде.

«Кеше бес ота жасадық. Өте күрделі оталар жасалды: ішіне қан кетуді тоқтаттық, біреуінің аяғын кесіп тастадық. Өкінішке қарай, зардап шеккен әйелдің аяғын аман алып қалу мүмкін болмады», — деді Ли. Дәрігер кейбір науқастардың әлі ұзақ уақыт ем алатынын айтты. Бірақ кейбіреулері 7-10 күннен кейін ауруханадан шығарылады екен.