
Жезқазғанда зейнеткер аурухана жанындағы шұңқырға құлады Жезқазғанда орталық аурухана маңында қазылған шұңқырға зейнеткер әйел құлап кетті. Құрылыс жұмыстары жүргенімен айналасы қоршалмаған жердегі оқиғаны куәгерлер таспаға түсіріп алған. Бұл туралы КТК телеарнасы хабарлады.
2 жарым метр тереңдікке абайсызда оңбай құлаған әйелге медициналық көмек алыстан келген жоқ. Өйткені, құбыр төсеу жұмыстары орталық аурухана маңында жүргізілген. Мердігер қазылған жердің айналасын қоршамай, тек белгі беретін ленталар тартып қойған екен. Алайда, тұрғындар жолды қысқарту үшін траншеяның үстіне тақтай төсеп өтіп жүрген көрінеді. Кеше сол өткел сынып кетіп, бір адам опат бола жаздады.
Ақылтай Хамитов, облыстық денсаулық сақтау басқармасының техникалық жабдықтау бөлімінің қызметкері:
— Қазір жарақат алған зейнеткер сол ауруханаға жатқызылды. Жағдайы орташа. Арқасы мен бел тұсын зақымдаған. Мердігер компания қазылған жердің маңында белгі орнатқандарымен оны көбі елемейді. Соның салдарынан оқыс оқиға болып отыр.