
Қазақстандық аралас жекпе-жек шебері Жалғас Жұмағұлов MMA әлеміндегі ең беделді Ultimate Fighting Championship (UFC) промоушенімен келісім жасады, деп хабарлайды ҚазАқпарат Sports.kz-ке сілтеме жасап.
Бұл туралы спортшының менеджері Саят Әбдірахманов Instagram парақшасында жариялады. «Arlan MMA Pro командасының балуаны Жалғас Жұмағұлов UFC-мен келісім жасады. Сені және осы жаңалықты асыға күткендерді құттықтаймыз», — деп жазды ол. Айта кетейік, бұл UFC-мен келісім жасаған екінші қазақстандық спортшы. Бұдан бұрын Шавкат Рахмонов промоушеннің балуаны атанған еді. Сондай-ақ, UFC-де ресейлік этникалық қазақ Дамир Исмағұлов өнер көрсетеді. Жұмағұловтың қашан дебют жасайтыны кейінірек белгілі болады.