«Юбилейный»: Өрттің себебі белгісіз

Бүлінген 23 пәтерді Байбек үш күнде қалпына келтірмек Алматыдағы Абылай хан — Гоголь киылысындағы «Юбилейный» кафесінде бүгін таңертең өрт болды. Әзірге өрттің неден болғаны белгісіз. Оқиға орнында арнайы мамандар жұмыс істеп жатыр. Қала әкімінің ресми өкілі, Алмалы ауданы әкімінің орынбасары Ермек Бейсеуовтың айтуына жүгінсек, кафе орналасқан көп қабатты үйдің 23 пәтері бүлінген.

Оның жетеуі күрделі жөндеуді қажет етеді. Бейсеуовтың айтуынша, Алматы қаласының әкімі Бауыржан Байбек тиісті орындарға бүлінген 23 пәтердің барлығын үш күн ішінде жөндеп шығуға тапсырма берген.

«Кафеде шыққан өрт кесірінен зиян шеккен пәтерлерге жөндеу жұмысы кімнің
есебінен жүргізіледі?» деген «Жас қазақ» газетінің тілшісі қойған сұраққа Ермек Бейсеуов: «Ол жағын нақты білмейді екенмін. Ең бастысы — ешқандай адам шығыны орын алған жоқ» деп қысқаша жауап қайтарды. Бейсеуов, сондай-ақ, ешқандай газ балонының жарылмағанын, жақын мандағы жүргіншілердің тек жарылысқа ұқсас дыбыстың шыққанын естігенін мәлімдеді.