
Ұлытау облысында қаңғыған иттер ұсақ малға ауыз сала бастады. Ұлытау ауылы тұрғының қорасына түнделете түскен иттер 10 шақты қойды талап, арам қатырған. Бұл туралы КТК телеарнасы хабарлады.
Таң ата қойды өріске айдауға шыққанда мал иесі сұмдық көрініске тап болған. Иттер адамды көре сала жан-жаққа қашыпты. Қойлардың бір бөлігі шарбақты бұзып далаға шығып кеткен екен. Иттер қойдың бірсыпырасын жемтік қылса, қалғанының сау тамтығын қалдырмай талаған. Тіпті көрші үйдің де қорасына кіріп екі ешкіге ауыз салған. Таланған қойларды бауыздағанымен, ит тісі тиген ет жеуге келмейтіні мәлім. Мал иесі соңғы кездері қаңғыған иттер ауылдың берекесін кетірді дейді. Бұған дейін қозы-лақты сүйреп кетіп жүрген.
Жандос Қапет, Ұлытау ауылының тұрғыны:
— Осы оқиға бойынша Ұлытау село округінің әкіміне өтініш хат жаздым. Әкімнің жауабына қарасақ, заң жүзінде иттерді атуға, улауға болмайды екен. Ал егер ол иттер малға емес, адамға, балаға шапса не болады? Қырылған малдың құнын кім төлейді?