ҰҚК алтыны бар кенді ұрлаумен айналысқан топты ұстады

Ұлттық қауіпсіздік комитетінің өкілдері ұзақ уақыт бойы Қытайға құрамында алтыны бар кенді контрабандалық жолмен шығарумен айналысқан трансұлттық ұйымдасқан топты ұстады. Бұл туралы комитеттің баспасөз қызметіне сілтеме жасап Tengrinews.kz хабарлады.

ҰҚК мәліметінше, құрамында алтыны бар кенді ауқымды түрде заңсыз өндіру және ұрлау Ақмола облысының Степногорск өңірінде орналасқан кен орнынан жүзеге асырылған. Шикізатты зерттеу және қайта өңдеу үшін арналған жасырын зертханалар жойылды. © knb.gov.kz Алтын құрамы жоғары (тоннасына 1 келіге дейін) қазақстандық кен әртүрлі минерал (кварцит, пирит және басқалары) бүркемесімен жалған құжаттар бойынша шетелге шығарылған. Қылмыскерлер ай сайын шамамен 100 тонна құрамында алтыны бар шикізат шығарған.