Үйінен шығып, қайта оралмаған кейуананы туыстары тамыз айынан бері таба алмай әлек (фото)

Алматы облысында із-түзсіз жоғалып кеткен Қадиша Түсіпованың балалары көпшіліктен көмек сұрауда. Әжейді туыстары тамыз айынан бері таба алмай әлек. Бұл туралы Nur.kz Алматы арнасына сілтеме жасап хабарлады.

Қадиша Түсіпова 4-ші тамызда таңғы сағат 8-дерде үйінен шығып, содан бері оралмаған. Қарияны бала-шағасы мен туыстары шарқ ұрып іздестіруде. Одан қалды 50-ден астам ерікті де қол ұшын созған. Олар ауыл маңын түгелдей сүзіп шығып, ауруханалар мен мәйітханаға да сұрау салыпты. Алайда, еш нәтиже болмаған.
«Біз деген құзырлы органдарға, РОВД-ға барып өтініш жаздық. Сол каналдың бойында аяқ киімін қалдырып кеткен. Каналдың бойымен іздестірдік. Каналдың ішінде суын тоқтатып, үш рет іздестірдік. Өзіміз, туысқандарымыз 50 адамдай болып іздестірдік», — дейді Қадиша Түсіпованың қызы, Меруерт Әбілқасымова.

Әжейдің туыстары оны іздеп, сабылып жүргендеріне екі айдан асып барады. Олар мүмкін болған жерлердің барлығын аралап, сұрастырып шығыпты. Тіпті Қадиша Түсіпованың туыстары бақсы-балгерлерге барған көрінеді. Олардың барлығы аналарының тірі екенін және әйел адамның қолында екенін айтыпты. Алайда, мекен-жайын нақты көрсеткен ешкім жоқ. Ал, құзырлылар Қадиша Түсіпованы іздестіру жұмыстарының жүріп жатқанын айтады.

«Қазіргі уақытта із-түзсіз жоғалған азамтшаның орналасқан жерін анықтау бойынша жедел іздестіру шаралары жалғасуда. Іздестіру шаралары барысында жергілікті жерлерді, байланысты, таныстары, достары. Көршілерін сұрастыру бойынша тексерілуде», — деді Алматы облысы ІІД ресми өкілі, Айман Мырзекова.

Айта кетсек, жоғалған кейуана паркинсон ауруына шалдыққан және дәрінің көмегімен жүрген. Ал, кетерінде өзімен мүлдем дәрі-дәрмек алмаған. Сондықтан, бала-шағасы аналарының денсаулығына алаңдап, оны тездетіп табу үшін қайырымды жандардан көмек сұрауда.