Түрмеге есірткі кіргізген қызметкер сотталды

Таразда ЖД 158 /7 түзеу мекемесіне есіртікі кіргізген сол колонияның лауазымды қызметкеріне қатысты сот үкімі шықты. Жазасын өтеушіге 7 жарым грамм марихуананы 20 мың теңгеге сатқан режим бөлімі бастығының орынбасары енді 11 жылын темір тордың арғы жағында өткізбек. Бұл туралы КТК телеарнасы хабарлады.

Капитан Дәуренбек Дәулетбеков жазасын өтеушіге есірткіні өзі ұсынған. Бірақ сотталған азамат бұл жайында өзіндік қауіпсіздік басқармасы мен арнайы прокуратураға хабарлап қойыпты. Сөйтіп, режим бөлімі бастығының орынбасары марихуананы кіргізген кезде ұсталған. Ал, келісілген ақша оған алдын ала берілген болып шықты. Ол мұндай заң бұзушылыққа бірінші рет барған көрінеді. Бірақ, сонда да судья оған аяушылық танытпады. 11 жылға сотталған ол капитан шешінен де айырылды.