Түркияда коронавирус жұқтырды деген күдікпен 12 адам ауруханаға түсті

Оның 10-ы Қытайдан келген туристер, деп хабарлайды «Хабар 24».

Қалған екеуі жүргізуші мен туроператор қызметкері. Қазір олар Ақсарай қаласындағы ауруханада бақылау үстінде. Бұл туралы елдегі меншікті тілшіміз Меруерт Қанағат жергілікті әкімшілікке сілтеме жасап хабарлайды. Тілшіміздің айтуынша, Қытайлық туристер осы күндерде елге саяхаттап келген. Олардың ішінде, біреуі жөтелуіне байланысты кеше кешкісін медициналық ұйымға жүгінген. Сол себепті, науқастың қасындағы байланыста болған 11 кісіні санитарлық- карантиндік тексеруге алынған.

Қазір коронавирустың бар- жоғы әлі расталған жоқ. Али Манты, Ақсарай провинциясының губернаторы:

– Саяхат тобындағы бір Қытай азаматы жөтелуіне байланысты ауруханаға жүгінді. Сосын қалған байланыста болған 11 кісі де Ақсарай зерттеу ауруханасына жеткізілді. Әзірге, ешқандай ауру расталған жоқ.

Керим Йешилдағ, провинциялық денсаулық сақтау директоры:

– Сақтық шарасы ретінде 24 сағатқа дейін бақылаймыз. Өкпе мен қанға сараптама жасалды. Таза шықты. Қалған анализдер денсаулық сақтау министрлігіне жіберілді. Жауап келгеннен кейін оларды ауруханадан шығарамыз.