Түркістан облысында ер адам зейнеткер әйелді тірідей өртеп жіберді

Түркістан облысында Шымкенттен небәрі 30 шақырым жердегі Сайрам ауданында жантүршігерлік оқиға болды. Ер адам зейнеткер әйелді тірідей өртеп жіберді деп хабарлайды Otyrar.kz сайты.

Мәлімет бойынша, мұндай қатыгездікке баруына екі ер адамның екеуара жанжалдасуы себеп болған. Төбелесіп таяқ жеген ер адам ашуланып, өшін алу үшін бензин алып келген.

Терезені сындырып, аулада айқай салған. Сол сәтте үйден зейнеткер әйел аулаға шыққан. Ішімдік ішкен ер адам оған бензин шашып, өртеп жіберген.

Жедел іздестіру шаралары барысында екі күдікті де ұсталды.

Олардың біреуіне қатысты ҚК-нің 293-бабы «Бұзақылық» бойынша қылмыстық іс қозғалды, сот шешімімен одан кепіл алынып, үйіне жіберілді.

Екіншісіне қатысты ҚК-нің 99-бабы «Адам өлтіру» бойынша сотқа дейінгі тергеу жүргізіліп жатыр. Күдікті қамауға алынды.

«Сараптама тағайындалды. Оқиғаның мән-жайы анықталып жатыр», — деді Түркістан облысы полиция департаментідегілер.