
Полицейлердің мәліметінше, Түркістан қаласында аса ірі көлемде героин тасымалдаған тұрғын ұсталды.
Есірткіні заңсыз сақтау және тасымалдау туралы ақпарат облыстың Полиция департаменті Есірткі қылмысына қарсы іс-қимыл басқармасына түскен. Арыз бойынша бірден шұғыл қимылдар басталған. Есірткі қылмысына қарсы іс-қимыл басқармасының қызметкерлері «Шымкент-Самара» тасжолымен қозғалған жолаушы автобустарын тексеруге кіріскен. Оның барысында «Алматы-Түркістан» бағытында келе жатқан автобустағы жолаушы әйел күдік тудырған. Тінту кезінде әйелдің сөмкесінен қағазға оралып, полиэтилен пакетіне салынған ақ-сұр түсті есірткіге ұқсас ұнтақ табылды. Сараптама тағайындалып, оның қорытындысы бойынша тәркіленген заттың жалпы салмағы 60 грамға жуық героин екені анықталды. Яғни героиннің бұл салмағы 300-ге жуық бірреттік дозаға тең. Аталмыш факті ҚР ҚК-нің 297-бабымен (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) сотқа дейінгі тергеп-тексерудің бірыңғай тізіліміне тіркелді. Күдікті әйел қамауға алынды.