«Тістеген жерін жұлып алған». Павлодар облысында ит тұрғынға шабуыл жасады

Павлодар облысында ит тұрғынды тістеп алды. Зардап шеккен ер адам ауруханаға жеткізілді, ал ит иесіне айыппұл салынды.

Павлодар облысы Полиция департаментінің баспасөз қызметі мәліметінше, оқиға 20 қазанда кешке Павлодар облысы Үміт ауылында болған.

«Ауыл шетіне малын күтіп алуға шыққан 62 жастағы жергілікті тұрғынға төбет тұқымдас ит шабуыл жасаған. Ит тістеген жерін жұлып алған», — деді ПД баспасөз қызметі өкілдері.

Оқиға куәгерлері жедел жәрдем мен полиция шақырған. Ит жәбірленушінің қолын бірнеше жерден тістеген. Сонымен қатар, білектің үстіңгі жағын тістеп жұлып алған. Ер адам Павлодар ауруханасына жатқызылды.

Полицейлер ит иесі қазірдің өзінде анықталғанын айтты.

«Жануардың иесіне қатысты ҚР ӘҚБтК-нің 408-бабы 2-бөлігі «Жеке тұлғалардың денсаулығына немесе мүлкіне зиян келтірген иттерді ұстау және серуендету ережелерін бұзу» бойынша әкімшілік іс қозғалды», — деді Павлодар облысы Полиция департаменті баспасөз қызметі өкілдері.

Tengrinews.kz