Талдықорғанда 10 жезөкше ұсталды

Талдықорғанда полицейлер арнайы рейд барысында 10 жезөкшені ұстады. Тәнін саудаға айналдырғандардың 6-ы көрші елдің азаматшалары болып шықты, деп хабарлайды ҚазАқпарат.

Сондай ақ осы іске тікелей қатысы бар деген күдікпен қаладағы қонақ үйлердің бірінің және саунаның қызметкерлері қолға түсті. Қазір олардың үстінен ҚР Қылмыстық кодексінің 309-бабына сәйкес іс қозғалды. Полицейлердің мәліметінше, шетелдік азаматшалар Қазақстанға қыркүйек айының соңына таман келген. Тәнін саудалауды мақсат еткен олар Қазақстаннан депортацияланатын болады. Қазір мәселенің анық-қанығы анықталғанша олар қамауға алынды. Айта кету керек, облыстық ІІД-ның Ұйымдасқан қылмысқа қарсы күрес басқармасы ұйымдастырған арнайы рейдке СПИД орталығының мамандары да қатысуда. Олар ұсталған жезөкшелердің анализдерін алып, арнайы тексерістен өткізуде.