Түркия аумағына енуге тыйым салынған отандастарымызға қатысты СІМ өкілі түсінік берді

Қазақстандық 2 мыңға жуық азаматқа Түркияға кіруге тыйым салынды деген БАҚ-та тараған ақпаратқа байланысты Сыртқы істер министрлігінің баспасөз хатшысы Әнуар Жайнақов пікір білдірді, деп хабарлайды jazqazaq.kz тiлшiсi.

«Түркиядағы Қазақстан Елшілігіндегі әріптестеріміз БАҚ-та жарық көрген ақпараттың аздап бұрмаланғанын хабарлады. Сондықтан сіздерге осы жайтты түсіндіріп берейін. Біздің мәліметке сәйкес, Түркияның Ішкі істер министрлігі «Түркия ДАИШ-пен күресте» деп аталатын кітап шығарған. Бұл кітапта түрік билігі лаңкестік ұйымдармен қалай күрес жүргізетіндігі жөнінде жазылған. Әріптестерімнің айтуы бойынша, осы кітаптың соңында 2011 мен 2017 жылдың аралығында аталған лаңкестік ұйымға қатысы бар деген айыппен немесе күдікпен ұсталған түрлі елдердің азаматтарының саны келтірілген. Оның ішінде Қазақстан, Ресей, Франция, Сауд Арабиясы және басқа да елдердің азаматтары бар. Бұл кітап болған соң бізде ол адамдардың тізімі жоқ. Жалпы бұл мәселе – құқық қорғау органдарына қатысты сұрақ », — деді Әнуар Жайнақов.