Шымкенттік мұғалім аялдаманы паналап жүр

Баспананың орнына- аялдама, жылы кереует орнына -ағаш орындық. Өзін Елена деп таныстырған бұл әйел бірнеше айдан бері аялдаманы паналап келеді. Айтуынша, басқа барар жері жоқ.

Өзінің үйінен пәтерін жалға алған азаматтар қуып шыққан көрінеді. Бұрын бірнеше мектепте тарих пәнінен сабақ берген тәжірибелі ұстаз болғанмын дейді. Әрі қарай бәрі шым-шытырық. Алдымен күйеуі тастап кеткен. Ізін ала бере балалары да анасынан бас тартқан. Бұл айтып отырғандарының рас, не өтірік екендігі белгісіз. Ленаны аялдама маңына жақын орналасқан дәмхана қызметкерлері байқаған. Алғашқы болып дабыл қаққан да солар.

Ольга Кребцова, дәмхана қызметкері: «Біз бұл кісіге тамақ ұсынып көрдік. Тамақты алады. Алайда, алкогольдан бас тартады. Біз бұған дейін бірнеше рет полиция қызметкерлерін шақырған болатынбыз. Олар алып кетеді де, келесі аялдамаға апарып түсіреді. Ал жедел жәрдем қызметін шақырғанымызда, Ленаның құжаттары жоқ болғандықтан олар алып кетуден бас тартты».

Еленаның келісімімен белгілі тұрағы жоқ адамдарға арналған әлеуметтік бейімдеу орталығының жасағын шақырдық. Мекеме қызметкерлері ем-дом жүргізіп, толыққанды көмек беру үшін орталыққа алып кетті. Онда түскен азаматтарға алғашқы медициналық көмек көрсетіліп, ас-сумен толықтай қамтамасыз етіледі. Оған қоса, заң тұрғысынан да қол ұшын созып жәрдемдесетіндігі тағы бар.

Тастанбеков Өтжан, әлеуметтік маман: «Орталықтың телефон нөмірі 50-56-98. Күндіз-түні хабарласуға мүмкіндік бар бізде. Дезинфектор маманымыз жұмыс істейді. Барған бетте алдымен шомылдырады. Басқа киім-кешек береміз оларға».