Шымкенттік әйелдер күйеуінен қорғанудың әдістерін үйреніп жатыр

Шымкенттік қыз-келіншектерге күйеуінен қорғанудың әдіс-тәсілдері үйретіліп жатыр. Прокурорлардың «Зорлық-зомбылықсыз Қазақстан» жобасы аясында нәзік жандылар спорт мектебіне шақыртылып, оларға қорғану жаттығулары үйретілуде.

Қорғаныстың әдіс-тәсілдерін үйренуге кез-келген қыз-келіншек мүмкіндік алды. Алғашқы жаттығу Шымкенттің №11-ші спорт мектебінде өтті. 50-ге тарта тұрмыстағы әйелдер мен бойжеткен прокуратура органдары өкілдерімен кездесіп, бапкерден сабақ алды. «Статистикалық мәліметтерге сүйенсек, тұрмыстық зомбылық деректерінде әйелдер күйеулерінен көп таяқ жейді. Сондықтан біз жоба аясында осындай жаттығулар өткізуді қолға алып отырмыз. 19 мен 31 шілде аралығында осы спорт мектебінде арнайы бапкерлер қорғаныс әдістерін үйренемін деген нәзікжандыларға жаттығулар өтетін болады», — деді Абай аудандық полиция бөлімінің аға инспекторы Гульвира Бектемісова. Құзырлы орган өкілдерімен кездесуге келгендер ер адамға қарсылық көтеріп, қол көтеру біздің салт-дәстүрімізге қарама қайшы дейді. Дегенмен соңғы кездері ер азаматтардың қол көтеру жәйттері көбейіп бара жатқанын жасырмайды. Базбірі үйіндегі қыздарына осы әдістерді үйреткісі келетінін айтады. Қалай болғанда да бапкерлер үйренемін деушілерге есіктері айқара ашып отыр. Алдағы кезде мұндай жаттығулар облыстың қала-аудандарында ұйымдастырылатын болады.

ҚазАқпарат