Шымкенттегі медициналық инфрақұрылым: жаңа нысандар бой көтереді

Еліміздің үшінші мегаполисінде әлеуметтік инфрақұрылымды жаңғырту және тұрғындарға медициналық көмектің қолжетімділігін арттыру бағытындағы жұмыстар жалғасып жатыр. Президент Қасым-Жомарт Тоқаевтың медициналық инфрақұрылымды дамыту жөніндегі тапсырмасы аясында мегаполисте бірқатар жаңа нысан бой көтермек.

Соның ішінде Shymkent City шағынауданындағы жаңа емхана мен қалалық №2 көпбейінді аурухананың қосымша корпусының құрылысы басталды. Екі жоба да медициналық қызметтің қолжетімділігін арттырумен қатар, диагностикалау, емдеу және оңалту мүмкіндіктерін кеңейтуге бағытталған.

Shymkent City-де жаңа емхана салынады

Shymkent City шағынауданында ауысымына 500 келушіге арналған жаңа емхананың құрылысы басталды. Медициналық нысан 30 мыңнан астам тұрғынға қызмет көрсетуге есептелген.

Емхана құрылымында ересектер мен балалар бөлімшелері, әйелдер консультациясы және отбасылық денсаулық орталығы жұмыс істейді. Бұл алғашқы медициналық-санитариялық көмекті бір нысанның ішінде ұйымдастыруға мүмкіндік береді.

Жоба диагностикалық мүмкіндіктердің кең қамтылуымен ерекшеленеді. Мұнда клиникалық-диагностикалық зертхана, рентген-диагностика кабинеті, компьютерлік және магниттік-резонанстық томография, рентген-маммография және эндоскопия бөлімдері ашылады.

Сонымен қатар емханада 20 орындық күндізгі стационар, амбулаториялық хирургия орталығы, оңалту бөлімі және фтизиатр кабинеті орналасады.

Ана мен балаға – айрықша қамқорлық

Жаңа нысанды жобалау кезінде науқастарға барынша қолайлы жағдай жасауға, медицина қызметкерлерінің жұмысын тиімді ұйымдастыруға көңіл бөлінген.

Балалар бөлімшелері бір қабатта орналасып, олар үшін жеке лифтілер мен күту аймақтары қарастырылады. Бес жасқа дейінгі балаларды күту және патронаждық бақылау қызметін ұйымдастыру да қарастырылған.

Жүкті әйелдер мен босанғаннан кейінгі аналарды бақылауға арналған арнайы жағдайлар жасалады. Сөйтіп жаңа емхана емдеуге ғана емес, ана мен бала денсаулығын бақылауға, аурулардың алдын алуға және отбасылық медицина қағидаттарын дамытуға бағытталмақ.

Қала әкімі Ғабит Сыздықбеков жаңа емханаға капсула салу рәсімінде сөйлеген сөзінде: «Президенттің тапсырмасымен қалада әлеуметтік инфрақұрылым кезең-кезеңімен дамып келеді. Осы орайда баспана құрылысының қарқын алуымен қатар тұрғындарға қажет жағдай жасалуы да маңызды. Жаңа емхана тұрғындарға қажет медициналық қызмет алуға мүмкіндік береді», — деді.

Нысан аумағында кіреберіс жолдар, автотұрақтар, жаяу жүргіншілер жолдары, көгалдандырылған және демалыс орындары болады. Бұл медициналық қызмет көрсету сапасымен қатар, келушілердің ғимаратқа қолжетімділігін қамтамасыз етуге мүмкіндік береді.

№2 ауруханаға — жаңа корпус

Шымкент қалалық № 2 көпбейінді ауруханасында да медициналық қызмет көлемін арттыруға мүмкіндік беретін жаңа корпус салынады. Нысан 80 төсек-орынға есептелген.

Қалалық № 2 көпбейінді аурухана жыл сайын шамамен 20 мың пациент қабылдайды. Мұнда нейрохирургия, кардиология, инсульттік көмек, реанимация және перинаталдық медицина бағыттары бойынша қызмет көрсетіледі.

Жаңа корпустың іске қосылуы осы бағыттардағы медициналық көмектің мүмкіндігін кеңейтуге арналған. Атап айтқанда, нейрохирургия мен кардиореанимация бөлімдерін дамыту, инсульт, инфаркт және жіті коронарлық синдром кезінде медициналық көмекті жетілдіру көзделген.

Ғимаратта заманауи қабылдау-диагностикалық орталық орналасады. Бұл пациенттерді қабылдау мен қажетті диагностикалық шараларды ұйымдастыруға қосымша мүмкіндік береді.

Үш ғимарат — бір медициналық кластер

Жаңа корпустың тағы бір ерекшелігі — оның қолданыстағы аурухана және перзентхана ғимараттарымен жабық галерея арқылы байланыстырылуы.

Нәтижесінде үш ғимарат өзара байланысқан бірыңғай медициналық кластерге бірігеді. Мұндай жоспарлау пациенттер мен медицина қызметкерлерінің қозғалысын ұйымдастыруға, бөлімдер арасындағы байланысты жеңілдетуге бағытталған.

Жедел жәрдем көліктері үшін жеке бастырманың қарастырылуы да шұғыл медициналық көмек көрсету процесін ұйымдастыруға мүмкіндік береді.

Медициналық қолжетімділікті арттыруға бағытталған қадам

Шымкенттегі екі жобаның ортақ мақсаты — халық санының өсуіне байланысты медициналық инфрақұрылымның мүмкіндіктерін кеңейту.

Shymkent City-дегі емхана, ең алдымен, жаңа шағынаудандардағы тұрғындардың алғашқы медициналық-санитариялық көмекке қолжетімділігін арттыруға бағытталса, №2 аурухананың қосымша корпусы мамандандырылған және шұғыл медициналық көмектің көлемін ұлғайтуға мүмкіндік бермек.

Жаңа нысандардың ерекшелігі тек қосымша ғимараттар салумен шектелмейді. Заманауи диагностикалық жабдықтар, балалар мен отбасыларға арналған қызметтер, оңалту және күндізгі стационар мүмкіндіктері медициналық көмекті бір жүйеге шоғырландыруға жағдай жасайды.

Осы жобалар толық іске қосылған жағдайда, Шымкенттің медициналық инфрақұрылымы қаланың демографиялық және аумақтық дамуына сәйкес жаңарып, тұрғындарға медициналық қызмет көрсетудің жаңа мүмкіндіктері қалыптасады.

Талап Тілеген

Сурет: Шымкент қаласы Өңірлік коммуникациялар қызметі