Шымкентте жаңғақ сатып отырған әжейге дөрекілік көрсеткен полицейлерге қызметтік тексеру жүргізіліп жатыр (Видео)

25 қазан 2021, 11:50

Шымкентте жол бойында жаңғақ сатып отырған зейнеткерге екі полицейдің дөрекілік көрсеткенін куәгерлер видеокамераға түсіріп, әлеуметтік желіде бөліскен. Видеоролик Instagram-дағы Dudoser парақшасында пайда болды. Автордың сөзінше, тәртіп сақшылары әжейге ауыр сөздер айтып, телефонын алып қойған. Салдарынан 75 жастағы кейуана күйзеліске түсіпті.

«Бүгін Шымкенттегі «Қырғы базарының» кіре беріс жерінде 3-4 килограмм жаңғақ сатып отырған әжеге екі полицей келіп, заңсыз сауда жасағанына айыппұл салмақшы болыпты. Әжеміз полицейлерден қорқып қалған болуы керек, ұлына хабарласпақшы болғанда телефонынын да алып қойған көрінеді», — дейді видео авторы.

Аталған ролик әлеуметтік желіде тарағаны сол екен, Полиция департаменті қос инспектордың үстінен қызметтік тексеруің басталғанын хабарлады. Тексеру аяқталғаннан кейін оларға қандай шара қолданылғаны қосымша хабарланады.