
Шымкентте қыз алып қашу сәтін куәгерлер видеоға түсіріп алған. Видео әлеуметтік желілерде пайда болды. Қалалық полиция департаменті оқиғаның мән-жайын түсіндірді.
«Бұл видеоны куәгерлер жіберді. Олар кеше кешке Шымкент орталығында бір қызды күштеп алып қашқанын мәлімдеді», — дейді басылым авторы видео сипатамасында.
Шымкент полиция департаменті 2021 жылдың 3 наурызында сағат 20.00 шамасында қаладағы қонақүйлердің бірінің жанында Lexus маркалы автокөлігіндегі белгісіз біреулер қызды күштеп көлікке отырғызып, кетіп қалғаны туралы хабарлама түскенін айтты.
«Оқиға болған жерге келген жедел-тергеу тобы бірқатар қажетті шаралар өткізіп, оқиғаның мән-жайын анықтады. Сауалнама барысында 22 жастағы қыз 23 жастағы жігітімен ұрысып қалғанын, бірақ көлікке өз еркімен отырғанын түсіндірді. Сондай-ақ, бойжеткен жас жігітке ешқандай шағымы жоқ екенін айтты», — деп хабарлады Шымкент ПД өкілдері.
Tengrinews.kz