Шымкентте карантин ұзартылды

Шымкенттің бас санитарлық дәрігері Әбдіманап Төлебаев жаңа қаулысында карантинді ұзартып, жәрмеңкелер жұмысына рұқсат берді, деп хабарлайды Stan.kz.

Шымкенттегі карантиндік және шектеу шаралары 26 қазанға дейін ұзартылды.

Азық-түлік және азық-түлікке жатпайтын базарлар мен жәрмеңкелерде жұмыс уақыты 30 пайыздан аспайтын және бір адамға кемінде 4 шаршы метр болатын жағдайда 6.00-ден 18.00-ге дейін жұмыс істеуге рұқсат етіледі.

«Жәрмеңкелердің қызметін күшейтілген санитарлық-дезинфекциялық режимді сақтай отырып жалғастыру, оның ішінде дезинфекциялық туннель мен залалсыздандыру қондырғысын орнатуды қамтамасыз ету қажет», — делінген қарарда.

Сондай-ақ, жаңа құжат жәрменкелердегі балалар ойын алаңдары, батуттар мен фуд-корттардың жұмысына салынған тыйымды алып тастады.

Құжат Шымкент қаласы тауарлар мен қызметтердің сапасын бақылау және қауіпсіздігі департаментінің сайтында жарияланған.