Шымкентте бұқаралық спортқа басымдық берілуде

Мемлекет басшысы Қасым-Жомарт Тоқаев «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында бұқаралық спортты дамытуға ерекше мән берді. Бұл бағыт халықтың денсаулығын нығайтып қана қоймай, салауатты өмір салтын қалыптастырудың маңызды тетігі ретінде қарастырылады.
Президент тапсырмасын жүзеге асыру мақсатында еліміздің үшінші мегаполисі – Шымкент қаласында бұқаралық спортты дамыту, кәсіби спорттың әлеуетін арттыру және спорттық инфрақұрылымды жаңғырту бағытында жүйелі жұмыстар жүргізіліп келеді. Қалада жаңа спорт нысандарын салумен қатар, қолданыстағы кешендерді жаңарту және спорт инфрақұрылымын тұрғындарға барынша қолжетімді етуге басымдық берілуде.

65 спорт түрі дамып келеді

Шымкент қаласы Дене шынықтыру және спорт басқармасы басшысының орынбасары Ермек Аманжолұлының мәліметінше, бүгінде қаладағы 35 спорт ұйымында 65 спорт түрі дамытылуда.
Спорттық ұйымдардағы оқу-жаттығу жұмыстарына 1 121 жаттықтырушы тартылған. Оның 795-і штат негізінде қызмет атқарады. Ал спорт мекемелерінде тұрақты түрде жаттығатын спортшылардың саны 18 242 адамға жетіп отыр.
Қалада спорттың әртүрлі бағыттарын дамытуға мүмкіндік бар. Атап айтқанда, 22 олимпиадалық, 2 олимпиадалық емес, 2 паралимпиадалық, 1 сурдлимпиадалық және 10 ұлттық спорт түрі бойынша дайындық жүргізіледі.
Бұл көрсеткіштер Шымкентте спорттың тек кәсіби бағытта ғана емес, балалар мен жасөспірімдер арасында да кеңінен дамып келе жатқанын көрсетеді. Әсіресе спорт мектептері мен мамандандырылған ұйымдардың жұмысы жас спортшылардың шеберлігін шыңдауға мүмкіндік береді.

Таңғы жаттығу – бұқаралық спорттың бір тетігі

Бұқаралық спортты дамыту үшін тек спорт мектептері мен кәсіби кешендердің болуы жеткіліксіз. Тұрғындардың күнделікті өміріне дене шынықтыруды енгізу де маңызды.
Осы бағытта Шымкентте қаланың саябақтары мен аллеяларында тұрғындарға арналған таңғы жаттығулар ұйымдастырылуда. Дене шынықтыруды дамыту және іс-шараларды өткізу дирекциясының 31 спорт нұсқаушысы қаланың 13 саябағы мен аллеясында жаттығу жұмыстарын жүргізеді.
Мұндай бастамалардың ерекшелігі – тұрғындарға спортпен айналысу үшін арнайы спорт мектебіне немесе кәсіби залға барудың қажеті жоқ. Ашық аспан астындағы жаттығулар кез келген жастағы қала тұрғыны үшін дене белсенділігін арттыруға мүмкіндік береді.
Сонымен қатар биыл қалада 25 спорттық-бұқаралық іс-шара өткізілген. Жыл соңына дейін тағы төрт іс-шара ұйымдастыру жоспарланып отыр.

Спорт инфрақұрылымы кеңейіп келеді

Бүгінде Шымкентте 877 спорт нысаны бар. Оның 589-ы дене шынықтыру және спорт нысандарына тиесілі болса, 253 нысан білім беру ұйымдарының жанында орналасқан. Ал 35 нысан спорт мектептерінің қарамағында.
Қаланың аумағы кеңейіп, халық саны артқан сайын спорттық инфрақұрылымға деген сұраныс та өсіп келеді. Сондықтан жаңа нысандар салу мәселесі қала дамуының маңызды бағыттарының біріне айналып отыр.
Осы мақсатта биыл Қаратау ауданындағы Тұран шағынауданында дене шынықтыру-сауықтыру кешенін, сондай-ақ Базар қақпа тұрғын алабындағы стадион аумағында қосымша спорт нысанын салу жоспарланған.
Ал Тұран-2 шағынауданында 60 мың көрерменге арналған жаңа стадионның құрылысы жүргізілуде. Сонымен қатар Тұран шағынауданында паралимпиадалық және сурдлимпиадалық спорт кешенін салу жұмыстары қолға алынған.
Бұл жобалар спорттық жарыстар өткізуге арналған орындарды көбейтумен қатар, ерекше қажеттіліктері бар азаматтардың спортпен айналысуына қажетті жағдайды кеңейтуге бағытталған.

Қолданыстағы нысандар да жаңартылады

Спорт саласындағы инфрақұрылымды дамыту тек жаңа ғимараттар салумен шектелмейді. Бұрыннан бар нысандарды сақтау, олардың материалдық-техникалық базасын жақсарту және тұрғындарға сапалы қызмет көрсетуіне мүмкіндік жасау да маңызды.
Осыған байланысты «Мұз сарайы», «Локомотив» стадионы, Шаумян көшесіндегі футбол алаңы, Кешенді жоғары спорт шеберлігі мектебі және «Орталық су спорт кешені» ғимараттарында ағымдағы және күрделі жөндеу жұмыстарын жүргізу жоспарланған.
Бұл нысандарды жаңарту қаладағы спорттық дайындық жүйесінің тұрақты жұмыс істеуіне, спортшылардың жаттығу жағдайын жақсартуға және тұрғындардың спорттық нысандарды пайдалану мүмкіндігін арттыруға ықпал етеді.

Шалғай елді мекендер де назарда

Шымкенттегі спорт инфрақұрылымын дамытуда қала орталығына жақын аудандармен қатар, шалғай орналасқан елді мекендерге де көңіл бөлінуде.
Бұл мақсатта бірқатар жер телімдері заңдастырылып, болашақта спорт нысандарын салуға қатысты ұсыныстар енгізілген. Мұндай жұмыстар спорттық мүмкіндіктерді қаланың барлық аумағына біркелкі таратуға бағытталған.
Өйткені бұқаралық спорттың қолжетімділігі ең алдымен тұрғындардың спорт нысанына жақын орналасуына байланысты. Үйіне жақын жерде спорт алаңы, жаттығу залы немесе дене шынықтыру-сауықтыру кешені болған жағдайда азаматтардың тұрақты түрде спортпен айналысу мүмкіндігі де арта түседі.
Жалпы Шымкенттегі спорт саласын дамыту жұмыстары бірнеше бағытты қамтиды. Біріншісі – жаңа спорт нысандарын салу. Екіншісі – қолданыстағы кешендерді жаңғырту. Үшіншісі – бұқаралық спортты тұрғындарға барынша қолжетімді ету.
Бұл бағыттардың өзара сабақтастығы қаланың спорттық әлеуетін арттыруға мүмкіндік береді. Бір жағынан, кәсіби спортшылардың дайындалуына қажетті инфрақұрылым қалыптасса, екінші жағынан, қарапайым тұрғындардың дене шынықтырумен тұрақты айналысуына жағдай жасалады.
Шымкенттегі 877 спорт нысаны, 18 мыңнан астам тұрақты спортпен айналысатын азамат және ондаған спорт түрінің дамуы – бұл бағыттағы жұмыстың ауқымын көрсететін нақты көрсеткіштер. Ал жаңа стадиондар мен спорт кешендерінің құрылысы, қолданыстағы нысандардың жаңаруы және шалғай елді мекендерге спорт инфрақұрылымын жеткізу жөніндегі жоспарлар қаланың спорт саласын одан әрі дамытуға бағытталған.
Сайып келгенде, бұқаралық спорттың басты нәтижесі нысандардың санымен ғана емес, тұрғындардың спортқа тұрақты тартылуымен өлшенеді. Осы тұрғыдан алғанда, Шымкентте спортты күнделікті өмір салтына айналдыруға бағытталған инфрақұрылымдық және ұйымдастырушылық жұмыстар қатар жүргізіліп келеді. Бұл өз кезегінде салауатты ұрпақ қалыптастыруға және мегаполистің спорттық әлеуетін нығайтуға негіз болмақ.

Талап Тілеген
Сурет: Шымкент әкімінің баспасөз қызметі
Инфографика: jasqazaq.kz