Шымкентте бір отбасы астан уланып, екі бүлдіршін көз жұмды

Шымкентте бір отбасы астан уланып, анасы мен үш баласы ауруханаға түскен. Алайда дәрігерлер 1 және 4 жасар баланы аман алып қала алмады. 

Қалалық ТЖД баспасөз қызметінің мәліметінше, кеше сағат 10:30-да жұқпалы аурулар ауруханасына «тағамнан улану» диагнозымен бір отбасыдан шыққан балалар мен анасы түскен. Олар Еңбекші ауданына қарасты Алдияров көшесіндегі көпқабатты үйден жеткізілген. Отағасының айтуынша, алғашқы ауырған сәтте, яғни түнге 04:42-де осы мекенжай бойынша жедел жәрдем шақыртқан. Себебі, тамақтан уланған әйелі мен үш перзенті жаппай құсқан. Ауырсыну белгілері байқалған. Жедел жәреммен келген медицина қызметкерлері ем тағайындап, кетіп қалған. Алайда жанұя мүшелерінің жағдайлары одан сайын нашарлап, таңертең тағы медициналық көмек шақыртқан. Сөйтіп 1987 жылы туған анасы мен 2008, 2015, 2018 жылы туған балалары токсикологиялық бөлімшеге жатқызылған. «Күндізгі сағат 11:00-де жұқпалы аурулар ауруханасында 2015 ж. т. бала қайтыс болды. Артынша сағат 14:00-де 2018 жылы туылған бала көз жұмды. Қазіргі таңда олардың өлімнің себебі анықталуда. Сот-медициналық сараптамалар тағайындалды. Аман қалған екі адамның жағдайлары қанағаттанарлық. ТЖ департаментінің 3 қызметкері оқиға орнына барған. Олар мұқият талдаудан кейін улы газбен улану фактілерін тіркемеді»,- делінген хабарламада.