
Шымкент қаласының әкімдігі Ауғанстаннан босқындар қабылдауға дайындық жүріп жатқаны туралы ақпаратты жоққа шығарды, — деп хабарлайды Tengrinews.kz.
«Шымкент әкімдігінің баспасөз қызметі Ауғанстаннан келетін босқындарды қабылдауға дайындық туралы ақпарат шындыққа сәйкес келмейтінін ресми түрде хабарлайды. Тоғыс елді мекенінің №120 мектебінде жаңа оқу жылына дайындық бойынша жоспарлы жұмыстар жүргізіліп жатыр», — деді әкімдіктің баспасөз қызметі өкілі.
16 тамызда жергілікті Vera.kz газеті Шымкент Ауғанстаннан босқындар қабылдауға дайындалып жатқанын жазды. Газет мәліметінше, оларды екі ғимаратқа — бұрынғы студенттік жатақхана мен Тоғыс кентіндегі №120 мектептің ғимаратына орналастыру жоспарланған.
Бұған дейін Қазақстанның Сыртқы істер министрлігі Ауғанстаннан босқындар келетіні және оларды Шымкент пен Түркістан облысына орналастыру туралы ақпарат жалған екенін хабарлаған болатын.