Сауд Арабиясы вахабизмнен бас тартпақ

Бұл туралы Сауд Арабиясының мұрагер ханзадасы Мұхаммед бен Салман Эр-Риядта өткен экономикалық конференцияда мәлімдеді, деп хабарлайды Baq.kz ақпарат агенттігі hurriyet.com.tr басылымына сілтеме жасап.

Сауд Арабиясының мұрагер ханзадасы қысқа мерзім ішінде көтерген бастамалары арқылы көптің назарына ілікті. Мұхаммед бен Салман елінің қалыпты исламға бет бұратынын, осылайша экстремизмді жоятынын мәлімдеді.

Салманның бұл сөздері Сауд Арабиясында «революциялық сипаттағы» мәлімдеме ретінде қабылданды.

Мұрагер ханзада Сауд Арабиясы «аз уақыт ішінде» экстремизмді жоятынын білдірді.

«Бұрынғы қалпымызға қайта ораламыз. Барлық дінге және әлемге ашық қалыпты ислам мемлекетіне айналамыз», — деді ол панельдік пікірталаста.

Айта кетсек, бүгінде көптеген ел Сауд Арабиясын экстремистік террористік ұйымдарға қаржылай қолдау көрсетеді деп айыптайды.