Қарағандыда жалған шот-фактура жазумен айналысқан қылмыстық топ анықталды. Бұл туралы Қаржы министрлігінің қаржы мониторинг комитетіне сілтеме жасап ҚазАқпарат хабарлады.
Қаржы мониторингі комитетінің Қарағанды облысы бойынша экономикалық тергеу департаменті қызметкерлері «STOP ОБНАЛ» жедел алдын алу іс-шарасын өткізді. «Нәтижесінде бірқатар заңды тұлғалардың атынан нақты орындалмаған жұмыс пен жеткізілмеген тауарларға жалған шот-фактура жазумен заңсыз айналысқан ұйымдасқан қылмыстық топтың қызметі әшкереленді. Қазіргі уақытта «TerraStyleKAZ» және «АзимутИнвест» ЖШС қатысты сотқа дейінгі тергеу жүріп жатыр. Ұйымдасқан топтың бақылауындағы екі заңды тұлға қызметінің қаржы айналымы — 5,7 млрд теңге. Салық төлемеуден мемлекетке келген шығын көлемі – 1,7 млрд теңге» делінген хабарламада. Аталған қылмыс бойынша мүлкін тәркілей отырып, сегіз жылға дейін бас бостандығынан айыру жазасы қарастырылған.