Сағадиев сөзінде тұра ала ма?

Астанада өткен «Жас Медиа. Ақпараттық технологиялар мен Қазақстан медиа саласының заманауи тұжырымдамасы» атты форумда негізінен журналистиканың өзекті мәселелері жөнінде ой толғануы тиіс қой. Бірақ жастармен бетпе-бет жүздескен Білім және ғылым министрі әңгімені үш тілде білім беру мәселесіне ойыстырғанын өзі де байқамай қалды. Неге?

Шамасы бүгінгі қоғамда жерден кейінгі күйіп тұрған мәселеге орайы келгенде мемлекеттік ұстанымдармен оңтайлы жауап беруге мүмкіндігін жіберіп алмауға тырысты-ау. «Үш тілділік мәселесі – ол ең алдымен қазақ тіліне назар аудартады. Үш тілділік – ол қазақ тілі туралы бағдарлама», – деп қызына бастады әңгімесін. Әрі қарай:

–Қазақ тілінің жағдайы қазір көш ілгері. Бүгінде оқушылардың 70 пайызы қазақ тілінде білім алады. Биыл ұлттық тестілеуден өткендердің 72 пайызы өз білімін қазақ тілінде сынаған. Назарбаев зияткерлік мектептерінің гранты да, жоғары оқу орындарының гранты да 70 пайызы қазақ тіліне бөлінеді. Мәселе үш тілділікте емес, мәселе орыс мектептерінде оқитын бес жүз мың баланың қазақ тілін білмейтінінде. Сондықтан министрлік үш-төрт жылдың ішінде осынша баланы қазақ мектептеріне қайтаруды алдына мақсат етіп қойып отыр. Қазір осы мақсатты жүзеге асыру үшін үш-төрт зияткерлік институт арнайы әдістеме дайындап жатыр. Ол заманауи ғылыми негізде компьютерлік моделдеуден өткен әдістеме болады. Осы әдістеме арқылы алты айда қазақ тілін үйрене алады. Соны орысмектептеріндегі қазақ тілі сабақтарына қолданысқа енгізсек, үш жылдың ішінде бес жүз баланың қазақ тілінде сөйлейтініне сенемін. Үш тілділіктен ұтыламыз деген, толықтай қате түсінік, – деді Е.Сағадиев.

Білім және ғылым министрінің бұл сөзі үш тілділікке қатысты күмәнді ойларды бір сәтке болса да сейілтіп жібергендей болды. Бірақ… бір сәтке ғана. Себебі, осы бағдарламаның әлі де ойластырылмаған тұстары көп деген пікір қалың тұманнан да қоюлау ғой. Сағадиев сөзінде тұра ала ма, оған уақыт қана төреші.

Меңдолла ШАМҰРАТОВ