Ресейде көз жұмған қыздың анасы жүрек тебірентерлік жазба жариялады

Мәскеу мемлекеттік халықаралық қатынастар институтының терезесінен құлау нәтижесінде көз жұмған қазақстандық студент Томирис Байсафаның анасы әлеуметтік желіде жүрек тебірентерлік жазба жариялады.

Бұл туралы Томиристің анасы Инстаграмдағы парақшасында жариялады, деп жазады Stan.kz ақпараттық агенттігі.

«Махаббат, жүрек, өмірім менің кешір», – деп жазды Жанна Ахметова Instagram-дағы парақшасында.

Қазақ қызы терезеден құлаған университеттің баспасөз хатшысы Виктория Калашникова, МГИМО қайтыс болған Томирис Байсафаның туыстары мен жақындарына көмектесуге дайын екенін айтты.

«Бұл қайғылы оқиға. Туған-туыстарының қайғысына ортақпыз. Томиристің отбасы, туыстары, жақындары не сұрасада барлық жағынан көмектесеміз. Университет басшылығы үнемі олармен байланысып тұрады және қажетті көмек көрсетілетін болады», – деді Калашникова.

Айта кетейік, бүгін Мәскеудегі Склифософский атындағы ҒЗИ мәлімдегендей, Мәскеу мемлекеттік халықаралық қатынастар институтының МГИМО) төртінші қабатынан құлап кеткен 21 жастағы қазақстандық студент Томирис Байсафа көз жұмды.