Ресей астанасының орталығындағы гүл қоймасында болған өрттен 6 адам қаза тапты

Ресей астанасы Мәскеу орталығындағы Комсомол алаңында орналасқан гүлдер қоймасында болған өрт салдарынан мерт болғандар саны 6 адамға жетті.

Бұл туралы ҚазАқпарат ресейлік ТАСС агенттігіне сілтеме жасап хабарлайды.

Ресейдің Төтенше жағдайлар мемлекеттік мекемесінің баспасөз қызметі тағы бір адамның зардап шеккенін хабарлады.

Гүлдер қоймасынан өрт шыққаны туралы хабар жергілікті уақыт бойынша сағат 15:13-те түскен.

Өрт сөндірушілер ғимараттан 7 адамды алып шыққан. Өрт салдарынан бірінші және екінші қабаттың арасындағы қабырғалар құлаған. Жалын 2,5 мың шаршы метрді шарпып, оқшауланды, кейінірек өрттің сөндірілгені хабарланды.