Полицияға оқ атқан адам 15 жылға сотталды

Алматыда аңшы мылтығымен үйінің шырқын бұзып, полицияға оқ атқан бұзақы сотталды. 

37 жастағы Джафаров Радий 2017 жылы 11 желтоқсанда Ә.Молдағұлова көшесіндегі үйінде мас күйінде жанжал шығарған. Қалалық Полиция департаментінің баспасөз қызметінің хабарлауынша, ашуға бой алдырған ол үйіндегі аңшы мылтығымен төбеге екі рет атып, отбасын, көршілерін қорқытқан. Содан соң енесін соққыға жыққан. Бұл туралы ҚазАқпарат хабарлады. «Боран-188 жол-патруль полициясының экипажы келгенде мас бұзақы қарумен аулада еліріп жүрген. Тәртіп сақшылары әйелдерге қауіпсіз жерге қарай кетуін өтінеді. Полицейлерді көрген бұзақы машинаға қарай оқтала бастайды. Сол сәтте полиция экипажы қаруын тастауды, өйтпесе табельді қаруды қолданатындарын айтқан. Сонда бұзақы бір рет оқ атып үлгерген. Абырой болғанда, оқ көршісінің қоршауына тиген», — деді полк командирі Манап Сәттаров. Сол сәтте 24 жастағы сержант Абылайхан Оқас аспанға оқ атып ескерту жасайды. Бұл да бұзақыны тоқтатпады. Полиция сержанты Дәулет Кенжеғазы қылмыскердің ішінен атып, оны жарақаттауға мәжбүр болады. Шұғыл шақыртылған жедел жәрдем қылмыскерді ауруханаға жеткізеді. Ол жазылып шыққан соң сот алдында жауап берді. Ол «мас болғандықтан, кімге оқ атып жатқанымды көрмедім»деп ақталды. Сот Джафаров Радийді ҚР ҚК 380-бабының 2-бөлімімен айыпты деп танып 15 жылға бас бостандығынан айыру туралы шешім шығарды. Кейін апелляциялық коллегия бұл сот үкімін өзгеріссіз қалдырды.