
Қатты мас болған жеңіл атлет полицейлерге теңіз жағасында жүгіріп жүргенін айтқан, деп хабарлайды Pavlodarnews.kz.
Облыстық ПД баспасөз қызметінің хабарлауынша, автопатруль Н.Назарбаев даңғылының бойында күннің суықтығына қарамастан, көлік жүретін бөлікте бір майкамен жүгіріп өткен жас жігітті байқаған.
Біріншіден, ол төтенше жағдай туғызған, екіншіден, өз өміріне қауіп төндірген, себебі көліктің астына түсуі мүмкін еді. Тәртіп сақшыларының тоқтау туралы өтінішіне қолын бұлғап, өтіп кеткен.
Жас жігіт ұсталған кезінде қатты мас болған. Өзінің Павлодарда ұсталғанына таң қалған, өйткені ол теңіз жағалауымен жүгіріп жүргеніне сенімді болған.
— Жас жігіттің бірнеше жыл алкогольге тәуелділіктен зардап шегетіні және полиция есебінде тұрғаны анықталды, — делінген ПД хабарламасында.
Айта кетейік, облыста мұндай тұрғындардың саны 4 мыңнан асады. Полицейлердің айтуынша, бұдан шығудың жалғыз жолы — алкоголизмнен емдеу.