Пара алып жатқан жерінен ұсталды (видео)

Нұр-Сұлтан қаласының «Алматы» ауданы әкімінің орынбасары пара алды деп күдіктелуде. Сыбайлас жемқорлыққа қарсы іс-қимыл агенттігі шенеуніктің тұтқындалған сәтінің видеосын жариялады. Бұл туралы Сыбайлас жемқорлыққа қарсы іс-қимыл агенттігінің баспасөз қызметі хабарлайды.

Нұр-Сұлтан қалалық сыбайлас жемқорлыққа қарсы күрес қызметі «Алматы» ауданы әкімінің орынбасарына қатысты сотқа дейінгі тергеуді бастады. Шенеунік пара алды және жекеменшік компания директоры аталған тұлғаға пара берді деп күдіктелуде.

«Аудан әкімінің орынбасары жекеменшік компанияның директорынан ауданның жарықтандырылуына қатысты қызмет көрсету бойынша мемлекеттік сатып алулар жөніндегі келісімшарт бойынша атқарылған жұмыстар актілеріне қол қою барысында жасаған қорғаншылығы үшін 5 млн теңге көлемінде пара алды деп күдіктелуде. Тергеу жалғастырылуда», — делінеді хабарламада.

Сот күдіктілердің кінәсінің деңгейін анықтап, соңғы үкімді шығаратын болады.