Өскемен тұрғыны итін полицейге айтақтаған

Өскемен тұрғыны отбасылық жанжал кезінде итін полицейге айтақтаған,деп хабарлайды ҚазАқпарат тілшісі Шығыс Қазақстан облыстық полиция департаметінің баспасөз қызметіне сілтеме жасап. Полицияның мәліметінше, облыс орталығындағы аулалардың бірінде жұбайлар арасында ұрыс-керіс болған. Ер адам жанжал кезінде жұбайының бетінен жұдырықпен салып жіберген. Әйелі қорыққанынан «102» каналына хабарласқан. «Аталған мекенжайға екі учаскелік инспектор келген. Олар жұбайларды ажыратпақ болғанда ер адам итін полицейге айтақтаған», — деп түсіндірді ШҚО ПД баспасөз қызметінен. Пульбультерьер полицейдің аяғын тістеген, кейін иығынан қапқан. Осы кезде иттің иесі қашып кетпекке әрекеттенеді, бірақ оны қолға түсіріп үлгерген. Итті зардап шегуші тыныштандырған. Сот Өскемен тұрғынын кінәлі деп танып, бір жылға бас бостандығынан айырды. Ол қаупі жоғары қылмыстық-атқару жүйесі мекемесінде жазасын өтейтін болады. Бұдан бөлек, иттің иесі зардап шеккен полицейге 150 мың теңге көлемінде моральдық залал төлеуге міндеттелді.