Өрттен 5 адам құтқарылды

Алматыда Алатау ауданы Зерделі шағын ауданында 9 қабатты үй өртенді.

Қалалық ТЖД баспасөз қызметінің хабарлауынша, өрт туралы хабарлама қалалық ТЖД кезекші пультіне түнгі 00:13-те келген. 6 қабаттағы пәтердің балконынан басталған өрт асүйді де шарпып үлгерген. Өрт сөндірушілер оқиға орнына 10 минутта жеткен. Тексеру барысында 2-9 қабатқа дейінгі баспалдақ алаңын қалың түтін басқаны анықталды. Пәтердегі адамдар шыға алмай отыр екен. 6-8 қабаттағы пәтерлерден 5 адам, оның ішінде 2 бала қауіпсіз жерге шығарылды. Өрт сөндірушілер балаларды дымқыл орамалмен орап алып түскен. 45 жастағы әйел оттегі қалпағымен аман қалды. Тілсіз жау 00:46 ауыздықталып, 00:58-де сөндірілді. Қызыл жалын 6 шаршы метр аумақты жарамсыз етті.