Өлтіріп, мәйітін өртеген: Алматы облысында жоғалған қыздың денесі табылды

Алматы облысында кәмелетке толмаған баланы айуандықпен өлтіру оқиғасы орын алды. Полицейлер екі күдіктінің ұсталғаны туралы айтты, деп хабарлайды Zakon.kz.

Алматы полициясының баспасөз қызметінің хабарлауынша, 27 мамырда оның анасы кәмелетке толмаған қызының (2005 жылы туған) жоғалып кеткені туралы арыз жазған.

Әйелдің айтуынша, қызы 24 мамыр күні үйден белгісіз бағытта кетіп қалған.

Полицейлер оның жоғалып кетуіне қатысы болуы мүмкін адамдар тобын құрды. Олар Алматы облысында тұратын 1992 және 2001 жылы туған екі ер адам болып шықты. Қыз оларды жоғалған күні көшеде кездестірген.

Алматы ПД баспасөз қызметі:

Жедел іздестіру және тергеу іс-шаралары барысында күдіктілер кісі өлтіргенін мойындап, Қапшағай су қоймасынан алыс емес жерде оның денесінің көмілген жерін көрсетті. Сот-медициналық сараптама тағайындалды.

Ведомствода атап өткендей, қылмыстың ізін жасырмақ болған күдіктілер қыздың денесін өртеп жіберген.

Алматы ПД баспасөз қызметі:

Аталған қылмысты одан әрі тергеуді аумақтық принципке сәйкес Алматы облысы бойынша ПБ жүргізетін болады.