Нұрсұлтан Назарбаев: Міне, көзді ашып-жұмғанша жиырма жыл уақыт өтіп кетті

Бүгін Астанада елорданы одан әрі дамыту мәселелері жөніндегі мәжіліс басталды.

«Кеше ғана жаңа елордаға көшкен сияқты болып едік. Міне, көзді ашып-жұмғанша жиырма жыл уақыт өтіп кетті. Биыл Астананың 20 жылдығын атап өтетін боламыз. Менімен бірге сол кезде бірінші келген қатарластарым, басқа да жастардың есінде болса, біз ен далаға келдік. Бұрынғы Ақмола қаласына келдік. Жаңа қаланың орнында мидай дала, еш нәрсе жоқ болатын. Қазір келе жатқанда қаланы көргенде өзім де таңғаламын осылай болғанына. Біз ата-бабаның арманын орындап, Сарыарқаның төрінде ел ордасы Астананы салып, ол астананы әдемілеп, дүниежүзін таңғалдырып, көршілерімізді қуантатын шаһарға айналдырдық. Қысқаша айтқан осы екі-үш сөйлемнің ішінде қыруар еңбек жатыр, күндіз-түні, аязда, боранда тынбай тірлік істеген құрылысшылар, монтажшылар, қаланың ішін өңдеген адамдар және біздің де көптеген еңбегіміз бар. Сондықтан, осы 20 жылдықты қалай өткіземіз деген мәселемен биыл жиналып отырмыз. Жылда қаланың істеген шаруасын осылай кеңесте ақылға салып, әрі қарай не істеу керек екенін ақылдасамыз», — деді Қазақстан Президенті Нұрсұлтан Назарбаев.

Baq.kz