Нұр-Сұлтанда жеңіл жүрісті қыздардың притоны анықталды

Нұр-Сұлтан қаласында адам саудасына қатысты қылмыстардың жолын кесуге, анықтауға және ашуға бағытталған «STOP трафик» атты жедел-алдын алу іс-шарасы өткізілді, деп хабарлайды Azattyq Rýhy.

Іс-шара басталғаннан бері полицейлер 46 адамды анықтап, мамандандырылған есепке қойды, жезөкшелікпен айналысуға немесе жеңгетайлыққа әдейі үй-жай бергені үшін 4 азаматқа айыппұл салынды, ал 29 азамат әкімшілік жауапкершілікке тартылды.

«Полиция қызметкерлері жеңгетайлықпен айналысқан 40 жастағы азаматшаны ұстады. Массаж салонының астында әйел жезөкшелікпен айналысатын қыздарды ұстаған және ұйымдастырған. Ол өзінің теріс ниетімен ақша үшін қыздарды клиенттермен интимдік қатынасқа итермелеген. Сонымен қатар осыған ұқсас қылмыс жасағаны үшін 23 жастағы сауна әкімшісі де ұсталды. Тінту барысында ақша мен заттай дәлелдемелер алынды.

Қазіргі уақытта ұсталғандарға қатысты сотқа дейінгі тергеу жүргізілуде», — делінген ПД хабарламасында.

Аталған іс-шараны өткізу барысында полиция қызметкерлері тарапынан жеңгетайлық пен притон ұстаушылардың 10 фактісі анықталды.