Нұр-Сұлтан маңында 20 жылқыны пойыз басып кетті

Нұр-Сұлтанға жақын жерде пойыз жиырма шақты жылқыны қағып кетті, деп хабарлады Қазақстан ІІМ көліктегі полиция департаментінің баспасөз қызметі.

Оқиға 18 наурыз күні сағат 03.00 шамасында Нұр-Сұлтаннан 60 шақырым жердегі Еркіншілік-Сарыоба учаскесінде болған. Жүк пойызының машинисі қараңғы уақытта темір жолда жүрген малдарды бірден байқамай, 20 бас жылқыны қағып кетті.

Тексеру барысында көлік полицейлері 44 жастағы малшыны анықтады. Ол түнгі уақытта жылқыларды қараусыз қалдырған. Ер адамға қатысты ӘҚБтК-нің 559-бабы, яғни темiржолдардың бөлінген жолағында мал жаю қағидаларын бұзу фактісі бойынша әкімшілік құқық бұзушылық туралы хаттама толтырылды.