Мьянманың сұлулық ханшайымы рохинджа мұсылмандары туралы видеодан кейін тәжінен айырылды

Мьянманың 19 жастағы сұлулық ханшайымы Шви Ян Си рохинджа мұсылмандары туралы видео жариялағаннан кейін тәжінен айырылды, деп хабарлайды Baq.kz ақпарат агенттігі life.ru-ға сілтеме жасап.

Бойжеткен өзі түсірген бейнероликте рохинджа мұсылмандарын террор мен зорлық-зомбылықты жақтаушылар деп айыптаған. Оның ойынша, Мьянма мұсылмандары қаналып-езілген кейіп танытады, ал шын мәнісінде нағыз жасақшылар. Сондықтан биліктің оларға қарсы әрекетін түсінуге болады.

Видео жарияланғаннан кейін, сұлулық байқауын ұйымдастыратын Hello Madam Media Group компаниясы Шви Ян Сиді тәжінен айырды. Ханшайым тәжінен айырылуға өзінің азаматтық позициясы себеп болғанын айтып отыр. Алайда компания директоры мұндай шешімнің видео пайда болмай тұрып қабылданғанына сендіруде.

«Осы елдің азаматы ретінде, халқым туралы шындықты айту үшін танымалдылығымды пайдалануға міндеттімін», — дейді Шви Ян Си.