Мешітте ұрлық жасаған жігіт ұятқа қалды

Шымкентте намаз оқуға келген жас жігітті тонап кетті. Жаға ұстарлық жағдай қаладағы мешіттердің бірінде болған.

Алла үйіне құлшылық жасауға барған жас жігіт намаз оқу үшін сырт киімін шешіп қойған. Осы кезде сұқ қолды азамат оның қалтасындағы телефоны мен бағалы заттарын ұрлап кеткен. Намаз оқып шыққан азамат қалтасындағы телефонның қолды болғанын кейін байқаған. Бірден полицейлерге хабарласып, арыз жазыпты.

Мешітте ұрлық жасаған азаматты полицейлерге ұзаққа бармай-ақ құрықтап, қамауға алды. Алла үйінде қылмыс жасағандар бір емес, бірнеше рет қылмыс жасаған екен.

Нақтырақ айтқанда, күдіктінің шамамен 20 кісінің мүлкін ұрлау жайттарына қатысы бары анықталды.

ІІД баспасөз қызметінің мәліметінше, бұл іске қатысты қылмыстық іс қозғалып, сотқа дейін тергеу амалдары жүргізілуде.

«Полиция бөліміне 27 жастағы жәбірленуші арызданған, онда мешітке барған кезінде белгісіз тұлға оның киімінің қалтасынан бағасы шамамен 30 мың теңге тұратын ұялы телефонын ұрлап кеткенін көрсеткен.

Шымкент ҚІІБ ПБ-нің қызметкерлері жедел іздестіру іс-шараларын жүргізу барысында 20-25 жастағы күдіктіні ұстады. Тәртіп сақшылармен күдіктінің шамамен 20 кісінің мүлкін ұрлау жайттарына қатысы бары анықталды», -деп хабарлайды ОҚО ІІД баспасөз қызметі.

NUR.KZ