Мәжіліс алдағы 3 жылдың бюджетін мақұлдады

Бүгін Парламент Мәжілісінің жалпы отырысында палата депутаттары «2018-2020 жылдарға арналған республикалық бюджет туралы» заң жобасын мақұлдады, деп хабарлайды jasqazaq.kz тілшісі.

Жалпы отырысқа Премьер-Министрі Бақытжан Сағынтаев бастаған үкімет мүшелері қатысты. Жалпы отырыста Ұлттық экономика министрі Тимур Сүлейменов, Қаржы министрі Бақыт Сұлтанов және Ұлттық банк төрағасы Данияр Ақышев баяндама жасады.

«Бүгін біз еліміздің негізгі қаржы құжаты, яғни үш жылдық бюджетті мақұлдадық. Бұл – еліміздің тұрақты даму жолында Парламенттің де, Үкіметтің де атқарып келе жатқан ең жауапты әрі маңызды міндеттерінің бірі. Сондықтан біз бірлесіп, Елбасының тапсырмаларын басшылыққа алып, мемлекет қаржысын тиімді пайдалануға айрықша мән беруіміз керек», – деді отырыс соңында Мәжіліс төрағасы Нұрлан Нығматулин.

Ал Премьер-Министр Бақытжан Сағынтаев 2018-2020 жылдарға арналған бюджетті жобасын қабылдап, Үкіметке қолдау жасалғаны үшін Мәжіліс депутаттарына алғысын жеткізді.

«Бүгінгі мақұлданған бюджеттің жобасы негізінен экономикамыздың өсімін қамтамасыз етуге, әлеуметтік міндеттерді толығымен орындауға, негізгі бағдарламалық құжаттарды іске асыруға, яғни Мемлекет басшысының барлық тапсырмаларын орындауға мүмкіндік береді. Алдағы уақытта да сіздермен бірлесе іс-қимылдарымызды ортақтаса отырып, жұмысымызды жалғастырамыз деп сенім білдіргім келеді», – деді Бақытжан Сағынаев Мәжілістің жалпы отырысында.

Бейбіт Тоқтарбай

Астана