Коронавирус Оңтүстік Кореяны қыспаққа алды

Сейсенбі күні Оңтүстік Кореяда коронавирусты жұқтырудың тағы 600 жағдайы тіркелді. Осылайша елде ауруға шалдыққандардың саны 4812 адамға жетті.Бұл туралы Yonhap-қа сілтеме жасап ҚазАқпарат хабарлайды.  

Соңғы деректерге қарағанда, вирустан Оңтүстік Кореяда 28 адам көз жұмған.

Елде ауруды жұқтырудың 60 пайызға жуық оқиғасы Тэгу қаласындағы Синчхонджи (Shincheonji) діни сектасының мүшелерімен байланысты болып отыр. Тэгу – Оңтүстік Кореядағы 2,5 миллионға жуық тұрғыны бар ірі қала.

Елдің Әділет министрлігінің мәліметінше, бұл діни сектаның бірнеше мүшесі өткен аптада Қытайда коронавирус шыққан қала Уханьда болған.

Кореяның ауруларды қадағалау және алдын алу орталығының мәліметі бойынша, елде індет жұқтырудың 519 жаңа оқиғасы Тэгу қаласында, және тағы 61-і – оған көршілес Солтүстік Кёнсандо провинциясында тіркелді.

Сеул қаласында коронавирусты жұқтырудың тағы жеті оқиғасы тіркелген.

Оңтүстіккореялық сарапшылар елде коронавирусты жұқтырудың расталған оқиғалары алдағы күндері өсетінін болжап отыр. Денсаулық сақтау органдары Тэгу қаласындағы Иса Синчхонджи шіркеуінің (Shincheonji Church of Jesus) 210 мыңнан астам мүшесін тексеруге кірісті.