Алматыда көлігінің дауысын зорайтқан жүргізушілер жаппай жазаланып жатыр. Жыл басынан бері көшені басына көтерген 700-ден астам көлік иесі айыппұл арқалады. Бұл туралы КТК телеарнасы хабарлады.
Полицияның айтуынша, соңғы уақытта тәртіп сақшыларына түскен шағым көбейіпті. Түн ұйқысы төрт бөлінген тұрғындар көлігін гүрілдетіп жүретін жүргізушілер тыншытық бермейтінін айтады. «Бұдан былай жүргізушілердің көлігін заңсыз қайта жабдықтап тайраңдауына жол жоқ», — дейді полицейлер. Әкімшілік хаттама толтырылған темір тұлпар иелеріне 58 мың теңгеден айыппұл салынды. Ал дәл осылай екінші рет тұтылғандарға қолданатын әкімшілік жаза қатаңдатылады.
Жандос Мұратәлиев, Алматы қаласы ПД әкімшілік полиция басқармасының бастығы:
— Полиция департаменті басшысының бұйрығына сәйкес, біз апта сайын осы жұмыстарды жалғастырып тұрамыз. Көлікті қайтадан заңды түріне келтірмесе, ол көліктің мемлекеттік нөмірі тәркіленіп, көлікті орнына келтірмейінше, мемлекеттік нөмірі берілмейді.