Көкшетауда би. Карантиндегі дискотека (видео)

Шектеу кезінде шектен шықты. 200-ден аса көкшетаулық карантинді ұмытып, аулада дискотека ұйымдастырып, жанын салып билеген. Жеңіс күнін осылай атап өтіпті. Бұл туралы КТК телеарнасы хабарлады.

Төтенше жағдай кезінде мұнша жұрттың бала-шағасымен аулада топтасып билегеніне «әй» дейтін әже, «қой» дейтін қожа болмапты. Кешқұрым басталған би кеші даңғырлаған музыкасымен түннің бір уақытында бір-ақ тоқтаған. Екі айға жуық карантиндік шектеулермен үйінде отырған жұрт: «Бір серпіліп қалдық» — дейді. Дискотеканы түн ішінде еліміздің әнұранымен аяқтаған. Полиция би кешін ұйымдастырушыларды іздеп тапты. Көпшілікке көтеріңкі көңіл-күй сыйлағысы келген адам аталмыш көпқабатты үйдің тұрғыны болып шықты.

Әсем Әбдірахманова, Ақмола облыстық ПД баспасөз қызметінің өкілі:

— Осы үйдің тұрғыны, әйел адам пәтерінің терезесінен музыкалық құрылғысын бар дауысын қосып, тұрғындарды биге шақырған. Оған қазір тыныштықты бұзып және төтенше жағдай талабын орындамағаны үшін әкімшілік іс қозғалды. Құжаттар сотқа әзірленіп жатыр.