Қытайда сенделген қазақстандық студенттердің мәселесі шешілді

Қытайға оқуға барып, далада қалған қазақстандық студенттердің мәселесі шешілді, деп хабарлайды «Хабар 24» арнасы.

Талапкерлердің барлығы жатақханаларға орналастырылып, қазір олар оқуларына кірісіп кетті. Бүгін бұл туралы Сыртқы істер министрлігінің ресми өкілі Айбек Смадияров журналистерге мәлімдеді. Естеріңізде болса, Қазақстаннан 64 студент көрші елдің Наннинь және Гуанчжоу қалаларына ұшып барып еді. Алайда оларды әуежайдан ешкім қарсы алмаған. Осылайша бозбалалар 4 күн бойы өз қаражаттарына күн көруге мәжбүр болды. Кейін оқиғаның мән-жайына қанық болған Қазақстанның Бейжіңдегі консулы қытайлық университеттің ректорымен келіссөздер жүргізіп, студенттерді оқуға қабылдауға уағдаласты.

Айбек Смадияров, ҚР Сыртқы істер министрлігінің ресми өкілі: — Олар Қазақстанда бір компаниямен келісімшартқа отырып, сол компанияның ұсынысымен Қытайға оқуға барған. Ол жақтағы компания өз міндеттемелерін орындамай, осындай жағдайға ұшырады. Бірақ қазіргі таңда біздің елшінің белсенді қатысуымен бұл мәселе шешілді.