Қытай мұнайды юаньмен саудалай бастады

26 наурыз 2018, 15:29

Бүгін Шанхай халықаралық энергетика биржасында шикі мұнайдың фьючерстік келісімшарттары юаньмен саудаға салынды. Бұл туралы ҚазАқпараттың Қытайдағы меншікті тілшісі жергілікті бейтарап БАҚ-тарға сілтеме жасап хабарлады.

Бұл Қытайдың құрлықтық бөлігінде орналасқан биржадағы шетелдік инвесторларға қолжетімді алғашқы фьючерс болды. Саудаға шығарылған 15 фьючерстің базистік бағалары 1 баррель мұнай үшін, жеткізу мерзімдеріне байланысты, 416 юань (65,8 АҚШ доллары), 388 юань және 375 юань етіп белгіленді. Сессия ашылған соң 20 минут ішінде 14000 транзакция өткізілді. «Қытай шикі мұнайды импорттайтын алпауыттардың бірі. Мұнай фьючерстерінің юаньмен саудалана басталуы Қытай фьючерс нарығындағы айтулы оқиға болды», — дейді J.P. Morgan-ның Азия-Тынық мұхит өңіріндегі Халықаралық клиринг департаментінің басшысы Дэвид Мартин.