«ҚазМұнайГаз» ҰҚ АҚ-ға қарасты Атырау мұнай өңдеу зауытында минус 45˚С температураға дейін қатпайтын Altay-45 қысқы дизель отынының алғашқы партиясы өндірілді.
Жауапкершілігі шектеулі серіктестің 403 19154- 38-2020 стандарты бойынша дайындалған ДТ-А-К5 Altay 45 маркалы дизель отыны мұнайды терең өңдеу кешенінің Prime D 3205 дизель отынын гидротазарту қондырғысында шығарылды. Жаңа өнім K5 санатының экологиялық талаптарына сай. Күкірттің аз мөлшерде болуы және төмен температуралық қасиеттерін жақсартатын қоспалардың жоқтығы арқасында өнім арктикалық дизель отынының сапасына сәйкес келеді. Айта кетейік, Атырау МӨЗ – рекордтық қату температурасы төмен отын шығаратын еліміздегі алғашқы кәсіпорын. Жаңа дизель отынының бірінші партиясы ішкі нарықтағы қажеттілікті өтеу үшін шағын көлемде өндірілді. Алдағы уақытта сұранысқа қарай Altay-45 дизель отынын өндіру көлемі ұлғайтылады. Еске сала кетейік, 2019 жылы Атырау МӨЗ елімізде сол кездегі ең төмен температурадағы Khazar -38 дизель отынын өндіре бастаған еді. Бүгінде зауыт Altay-45 өндірісінің басталуымен сүзгілеудің төмен температурасымен аязға төзімді дизель өнімдері желісін шығаруды жалғастырды. Дизель отынының жоғары сапалы төмен температуралы түрлерін өндіру Атырау МӨЗ-ді үш кезеңдік жаңғырту аясында салынған жаңа қондырғыларды іске қосқаннан кейін мүмкін болды.
Айдос Құсайынұлы