Қырғызстанның экс-президенті Асқар Ақаевқа тағылған айыптар алып тасталды

Қырғызстанның бұрынғы президенті Асқар Ақаев Мәскеуге ұшып кетті. Бұл туралы бұрынғы мемлекет басшысының әріптесі Бекболот Талғарбеков айтты, — деп хабарлайды Tengrinews.kz тілшісі 24.kg сайтына сілтеме жасап.

Оның айтуынша, бұрынғы мемлекет басшысына тағылған барлық айып алып тасталған — Ақаевқа қатысты қылмыстық іс қылмыс құрамының болмауына байланысты тоқтатылды. Тергеуде оның да, оның жақындарының да «Кұмтөр» жобасынан ақша алмағаны анықталды.

«Асқар Ақаевтың Centerra Gold Inc.-те бірде-бір акциясы жоқ. 2003 жылы Үкімет Centerra құру туралы шешім қабылдады. Келісімді құрамына «Қырғызалтын» кірген мемлекеттік комиссия, оның ішінде Үкімет пен парламент өкілдері, соның ішінде Ақылбек Жапаров та дайындады. Үкімет тек келісімді мақұлдады. Оған дейін бұл келісімді Дүниежүзілік банк пен Халықаралық валюта қорының сарапшылары қарастырды. Олар оң қорытынды берді», — деді Бекболот Талғарбеков.

Ол егер қылмыстық істі тергеу барысында Асқар Ақаевқа қандай да бір сұрақтар туындаса, оны қайтадан куәгер ретінде жауап алуға шақыруы мүмкін екенін айтты.

Еске салайық, 2 тамызда Қырғызстанның бұрынғы президенті Асқар Ақаевтың Бішкекке оралғаны белгілі болды. Ол осыған дейін «Құмтөр» жобасын іске асыру кезінде сыбайлас жемқорлыққа жол берді деген күдікпен іздеуде болған. Ол бірден ҰҚК ғимаратына жеткізілді, онда оның қатысуымен кен орны бойынша қылмыстық іс аясында қажетті тергеу әрекеттері жүргізілді.

Кейін Асқар Ақаев Қырғызстан астанасына 14 желтоқсанда ұшып келген болатын.