Қостанай облысында алаяқ тұрғындардың 10 миллион теңгесін алып қойған

Қостанай облысында алаяқ тұрғындарды 10 миллион теңгеге алдап кеткен, — деп хабарлайды Tengrinews.kz.

Қостанайлық өзін Ресейдің тұрғынымын деп таныстырып, адамдардан банк картасының шот нөмірін беруін өтінген. Ол өзіне туыстары ақша салатынын айтқан. Сөйтіп, облыстың 15 тұрғынын алдап, оларға онлайн несие рәсімдеген.

29 жастағы облыс тұрғыны 10 миллион теңгеге жуық шығын келтірген. 15 дерек бойынша қылмыстық іс тергеліп жатыр.

«Ер адам тұрғындардың сеніміне кіріп, өзін шетел азаматы ретінде таныстырған. Ол қиын жағдайда, ақшасыз қалғанын айтқан. Алаяқ тұрғындардан туыстары оған ақша жіберу үшін банк шоттары туралы мәліметтерді сұраған», — дейді Қостанай қалалық полиция басқармасының тергеушісі Саят Асанов.

Күдікті жәбірленушілердің телефондары арқылы онлайн несиеге өтініш беріп қана қоймай, тауар сатып алған.

Қазір бұл дерек бойынша ҚР Қылмыстық кодексінің 190-бабы «Алаяқтық» бойынша соталды тергеу амалдары жүргізіліп жатыр.